Пратеникот на СДСМ, Јован Митрески, на денешната собраниска седница постави пратеничко прашање до министерката за финансии, Гордана Кочоска, во врска со наодите од ревизорскиот извештај за работењето на Фондот за пензиско и инвалидско осигурување.
Митрески укажа на, како што наведе, сериозни забелешки во извештајот кои се однесуваат на доцнење во префрлањето на средствата кон вториот пензиски столб, иако Фондот навремено ги пресметувал и доставувал налозите до Трезорот.
Според него, ревизорскиот извештај покажува дека, заклучно со периодот на ревизија, вкупниот долг за непрефрлени средства кон вториот пензиски столб изнесувал 2,6 милијарди денари, односно околу 44 милиони евра.
„Во законот јасно е наведено дека шесте проценти од придонесите што одат во вториот пензиски столб треба да бидат префрлени веднаш, но не подоцна од пет работни дена. Ревизорскиот извештај покажува дека овие средства стоеле во Трезорот и по два месеци, иако Фондот навремено ги доставил сите пресметки и налози“, рече Митрески.
Тој нагласи дека станува збор за средства на околу 600.000 граѓани кои се членови на вториот пензиски столб и дека секое доцнење директно влијае врз нивните идни пензиски заштеди и приносот што тие треба да го остварат.
„Не е исто дали 100 денари ќе бидат уплатени денес или по два месеца, бидејќи тие средства треба да носат принос. Ако нема надомест за доцнењето, тогаш губат граѓаните“, истакна пратеникот.
Митрески побара од министерката за финансии да одговори колкав надомест треба да биде исплатен поради ненавременото префрлање на средствата и дали Министерството ќе ја надомести евентуалната штета што ја претрпеле осигурениците.
Тој потсети дека законските одредби предвидуваат исплата на соодветен надомест во случај на доцнење на уплатите во вториот пензиски столб.
