МНТ го објави репертоарот за ноември и декември – премиера на „Црно злато“ и десетици изведби

Македонскиот народен театар (МНТ) го објави репертоарот за ноември и декември, со повеќе од 30 закажани изведби и настани, меѓу кои премиера на нова претстава, гостувања, музичко-сценски содржини и програма за најмладата публика.

Централно место во ноемвриската програма има новата претстава „Црно злато“, чија претпремиера е закажана за 26 ноември, а премиерата за 27 ноември, двете со почеток во 20 часот. Претставата ќе продолжи да се изведува и во декември, со термини на 1, 4 и 29 декември.

— реклама —

Ноемврискиот репертоар започнува на 2 ноември со „Страв и надеж“, додека на 5 ноември истата претстава ќе гостува на 22. Меѓународен фестивал на актерот во Никшиќ. На 9 ноември е закажана „Не се клади на Енглези“, а на 10 и 11 ноември ќе се одржи „Као Какао“.

Од 13 до 21 ноември се предвидени повеќе изведби на „Златно славејче“, додека на 17 ноември на репертоарот е „Марта Верина“, на 18 ноември „Кец на десетка“, на 19 ноември „Торонто експрес“, а на 20 ноември „Бели ноќи“.

— реклама —

За најмладите, на 28 ноември ќе се изведе „Лефти и Рајти си најдоа дом“, во два термина, од 12 и од 17 часот. Ноемвриската програма завршува на 30 ноември со „Широк дијафазон“.

Во декември, покрај „Црно злато“, публиката ќе може да ги проследи „Мој термин“ на 2 декември, „Народен пратеник“ на 9 и 22 декември, како и „Као Какао“ на 11 и 12 декември.

— реклама —

Претставата „Страв и надеж“ повторно е закажана за 14 декември, а „12“ ќе се изведува на 16 и 17 декември. Следуваат „Кец на десетка“ на 18 декември, „Три сестри“ на 19 и 25 декември и „Марта Верина“ на 21 декември.

Во последната недела од годината, на репертоарот се „Животот е прекрасен“ на 23 декември, „Торонто експрес“ на 24 декември и „Бели ноќи“ на 26 декември, додека последната закажана изведба за годината е „Црно злато“ на 29 декември.

Најголемиот дел од вечерните претстави започнуваат во 20 часот, согласно објавениот распоред.

Билетите се достапни преку официјалната веб-страница на МНТ, како и на билетарницата на театарот, која работи секој работен ден од 13 часот.