Индискиот премиер Нарендра Моди и американскиот претседател Доналд Трамп договорија да одржуваат блиски контакти со цел продлабочување на стратешкото партнерство меѓу двете земји.
Во телефонскиот разговор, двајцата лидери разговарале за билатералната соработка во областа на трговијата, одбраната, енергетиката и клучните технологии, соопшти кабинетот на индискиот премиер.
„Лидерите повторно ја потврдија својата посветеност на унапредување на сеопфатното глобално стратешко партнерство меѓу Индија и САД и се согласија да одржуваат блиски контакти со цел продлабочување на соработката“, се наведува во соопштението.
Моди и Трамп размениле мислења и за регионалните и меѓународните случувања, вклучително и за напорите за унапредување на глобалниот мир и безбедност.
Разговорот се одржа во период кога индискиот министер за трговија Пијуш Гојал престојува во САД, каде што преговара за предложениот билатерален трговски договор и можен привремен договор.
Гојал во САД престојува од 29 септември до 5 октомври. Индија и САД по повеќемесечни преговори сè уште немаат постигнато договор, а Њу Делхи настојува да обезбеди поповолни услови во предложениот договор.
Индија претходно овој месец соопшти дека го предупредила Вашингтон оти новите американски царински мерки поврзани со индиското купување руска нафта би можеле да влијаат врз билатералните односи.
