Молк од Зеленски по повикот за избори во Украина среде војната

Украинскиот претседател Володимир Зеленски сè уште нема официјално реагирано на повикот на неговиот поранешен соработник Михаил Федоров за одржување избори во Украина, и покрај воената состојба во земјата.

— реклама —

Федоров, кој неодамна беше разрешен од функцијата министер за одбрана, во видеообраќање предупреди на, како што ја опиша, „системска криза во управувањето“ и порача дека земјата се плаши од промени. Иако директно не го прозва Зеленски, неговите изјави се толкуваат како критика кон претседателот, кој досега на прашањата за избори укажуваше дека во услови на воена состојба нивното одржување не е можно.

Според Би-би-си, Зеленски досега не се огласил за видеото на Федоров, чие разрешување предизвика протести во повеќе делови од Украина.

— реклама —

Извор од кабинетот на претседателот за британскиот медиум оценил дека одржувањето избори додека земјата е изложена на ракетни и дронски напади би било „многу бизарно“ и покажувало целосен недостиг на реализам.

— реклама —

Во меѓувреме, две украински агенции за борба против корупцијата соопштија дека спроведуваат посебна операција насочена кон актуелни и поранешни пратеници, како и кон службеничка во кабинетот на Зеленски.

Неколку часа подоцна, од кабинетот на украинскиот претседател беше соопштено дека е разрешена заменичката шефица на кабинетот, Ирина Мудра. Претходно, локалните медиуми известија дека бил извршен претрес во нејзините простории.

— реклама —

Федоров во своето обраќање ја обвини корупцијата дека ја остава украинската армија без оружје и опрема и дополнително го отежнува настојувањето на Киев да ја добие војната.