Во Србија минатата недела е потврден нов случај на мали сипаници, односно морбили, со што здравствените власти повторно го засилуваат вниманието кон имунизацијата на децата и спречувањето на ширењето на заразните болести.
Директорката на Институтот за јавно здравје на Србија „Д-р Милан Јовановиќ Батут“, професорката д-р Верица Јовановиќ, изјави дека епидемиолошката состојба во земјата засега е стабилна, но здравствените служби внимателно ја следат состојбата.
„Ситуацијата на територијата на Србија е стабилна. Според извештаите на здравствените установи, во текот на минатата недела е потврден еден случај на морбили“, изјавила Јовановиќ за РТС.
Таа нагласила дека особено е важно опфатот со вакцинација против мали сипаници, рубеола и заушки да достигне најмалку 95 отсто, особено кај децата на училишна возраст.
Според податоците што ги презентирала, минатата година опфатот со првата доза ММР вакцина во Србија бил само 73 отсто од целната популација. До поаѓањето на децата на училиште, опфатот со втората доза достигнал 91 отсто, но и натаму е под посакуваните 95 проценти.
Јовановиќ потсетила дека првата доза ММР вакцина треба да ја прими секое дете на возраст од една година, додека втората се дава пред почетокот на школувањето.
„Вакцинацијата не смее да се избегнува. Таа е заштита и за секое дете поединечно и за целиот колектив“, нагласила директорката на „Батут“.
Вакцината е достапна во здравствените домови, а снабдувањето, според Јовановиќ, е стабилно. Таа ги повикала родителите, кога детето е здраво, да се обратат кај избраниот педијатар и да се договорат за вакцинацијата.
Актуелниот случај е регистриран во област каде што опфатот со имунизација е низок. Поради тоа, дополнителен апел е упатен до родителите во Нови Пазар, Тутин, но и во другите средини, вклучително и Белград, да внимаваат на навременото исполнување на календарот за имунизација.
Во Србија во текот на 2024 година биле регистрирани повеќе од 200 случаи на морбили. Здравствените власти потсетуваат и на големата епидемија во 2017 и 2018 година, кога имало и смртни случаи.
Дополнителен ризик претставува и состојбата во соседна Бугарија, каде што се регистрирани повеќе од 500 случаи на мали сипаници. Затоа, на граѓаните кои патуваат таму, особено на оние што патуваат со мали деца, им се препорачува да посветат внимание на заштитата и да го проверат вакциналниот статус.
Во меѓувреме, Србија подготвува и промени во календарот за задолжителна имунизација. Според најавите, во седмо или осмо одделение ќе се воведе вакцина која содржи ацелуларна компонента против пертусис, односно голема кашлица.
Новата вакцина е дел од тригодишниот план за задолжителна имунизација, а во тек се подготовките за јавна набавка. Според Јовановиќ, оваа мерка е значајна не само за заштита на учениците, туку и за заштита на бремените жени.
