Руската амбасада во Берлин го оцени инцидентот со дрон опремен со експлозив, пронајден на аеродромот Лајпциг/Хале, како „провокација“ насочена против Москва.
„Очигледно е дека оваа избрзано организирана провокација служи исклучиво за целите на Киев и милитаристичкото крило на европската политичка класа“, соопшти руската амбасада на Телеграм.
Руската страна тврди дека случајот се користи за започнување на „нов бран на антируската хистерија во Германија“ и ја обвинува Украина дека стои зад инцидентот. За овие тврдења, сепак, не понуди докази.
Дрон опремен со експлозив и детонатор бил пронајден во вторникот доцна навечер на аеродромот Лајпциг/Хале, во близина на украински транспортни авиони.
Според досега објавените информации, дронот бил соборен од вработен на аеродромот.
Набргу по повторното отворање на воздушниот простор, еден авион се судрил со помал неидентификуван летечки објект. Истражителите проверуваат дали станува збор за уште еден дрон.
Американска проценка, за која претходно објави CNN, го поврзува пронајдениот дрон со руската разузнавачка служба.
Германските власти засега јавно не ја обвиниле Русија за инцидентот.
