Москва гради нови „суперзатвори“ со повеќе од 20.000 места

Русија планира до 2035 година да изгради седум нови затворски комплекси со повеќе од 20.000 места, а еден од нив е предвиден на привремено окупираната територија на Херсонската област во Украина.

Според официјален документ на кој се повикува независниот медиум „The Moscow Times“, новите установи ќе обединуваат истражни затвори и поправни колонии со различни степени на безбедност. Од вкупниот капацитет, 5.380 места би биле наменети за истражни затвори, а 15.120 за поправни колонии.

— реклама —

Освен во окупираниот дел на Херсонската област, вакви затворски комплекси се планирани во Калушката, Астраханската и Тјуменската област, Република Бурјатија и Забајкалскиот крај. Првиот објект од ваков тип треба да биде отворен во Татарстан до 2030 година.

— реклама —

Според пресметките на руското Министерство за правда, затворите од мешан тип би требало да ги намалат трошоците за сместување на затвореници и осомничени лица за 25 до 30 отсто.

Рускиот министер за правда Константин Чујченко претходно најави дека во новите установи, кои ги опиша како „суперзатвори“, ќе се применуваат современи организациски и инженерски решенија, вклучително и информатички технологии, како и дека ќе се обезбедат соодветни услови за работа на персоналот.

— реклама —

Шефот на Федералната служба за извршување на казните, Аркадиј Гостев, посочи дека во Русија од 1984 година не е изградена ниту една нова поправна колонија.

Најавата за изградба на нови установи доаѓа во период кога руските власти активно регрутираат затвореници за учество во војната во Украина, меѓу кои и лица осудени за тешки кривични дела.

Во исто време, според достапните информации наведени во извештајот, украинските воени заробеници се држат во нехумани услови, со наводи за тортура и недостиг на потребна медицинска помош, што претставува кршење на меѓународното хуманитарно право.