Муцунски за случајот со Ива Михаилова: Непристојно е земја членка на ЕУ да биде прибежиште за осудени лица

Министерот за надворешни работи и надворешна трговија, Тимчо Муцунски, оцени дека е непристојно земја членка на Европската Унија да стане прибежиште за лица осудени за кривични дела или за кои се водат судски постапки. Сепак, тој нагласи дека Македонија нема намера да се вмешува во политичката кампања во Бугарија, каде што се одржуваат претседателски избори.

— реклама —

На заедничката прес-конференција со словачкиот министер за надворешни работи, Јурај Бланар, Муцунски истакна дека Македонија, како земја кандидат за членство во ЕУ, очекува и земјите членки да ги почитуваат највисоките стандарди за владеење на правото.

— реклама —

Тој потврди дека дијалогот со Бугарија за евроинтеграциите продолжува, како и комуникацијата со европските институции и земјите членки, од кои е потребен консензус за одлуките поврзани со пристапувањето на Македонија во Унијата.

— реклама —

Муцунски најави дека во декември би можел да се сретне со бугарската колешка Велислава Петрова, на маргините на меѓународни средби. Посочи дека сака отворено да разговараат за европскиот пат, но и за прашањата што ја загрижуваат Македонија во односите со соседна Бугарија.

„Ние по однос на европскиот пат немаме никаква алтернатива“, порача Муцунски, додавајќи дека нема да дозволи неговата изјава да стане дел од политичката кампања во Бугарија.