МВР објасни зошто има гужва на Табановце: Странците ги плаќаат и старите прекршоци уловени со „Сејф сити“, а не само оние од денеска

Поголемиот број возила што денес се појавуваат на Граничниот премин Табановце се должи на тоа што е прв ден од примената на механизмот за постапување со странските возила за кои системот „Безбеден град“ евидентирал сообраќајни прекршоци, а во постапката се опфатени и претходно евидентираните прекршоци, соопшти Министерството за внатрешни работи.

— реклама —

Од денес, при излез од Македонија преку Табановце, се постапува и со возачите на возила со странски регистарски таблички, за кои системот претходно регистрирал сообраќаен прекршок на територијата на државата.

— реклама —

На возачите им се соопштува дека е евидентиран прекршок, по што им се издава записник за сторен сообраќаен прекршок со прекршочен платен налог, со можност казната да ја подмират согласно со законската постапка.

Од МВР велат дека преземаат активности за непречено спроведување на постапката и за намалување на задржувањето на патниците на граничниот премин.

— реклама —

Според Министерството, со воведувањето на механизмот се обезбедува еднаков и неселективен пристап во санкционирањето на сообраќајните прекршоци, без оглед на тоа дали станува збор за возила со домашни или странски регистарски таблички.

Примената на системот „Безбеден град“ за странските возила треба постепено да се прошири и на останатите гранични премини во државата.