МВР приведе 13 возачи за безобѕирно возење, меѓу нив и двајца малолетници

Во текот на изминатото деноноќие, полициски службеници на територијата на целата држава лишиле од слобода 13 возачи поради безобѕирно управување со моторни возила, соопшти Министерството за внатрешни работи.

— реклама —

Од приведените, дури 11 управувале возило без да поседуваат возачка дозвола, при што двајца од нив биле малолетници. Дополнително, две лица биле затекнати како управуваат возило под дејство на алкохол.

Според информациите на МВР, во Скопје биле лишени од слобода четири лица, меѓу кои и еден малолетник, поради управување возило без возачка дозвола. По две лица биле приведени во Тетово и Куманово, при што во Тетово едно од лицата било малолетно.

— реклама —

По едно лице без возачка дозвола било затекнато во Гостивар, Кочани и Прилеп.

— реклама —

Во однос на возачите кои управувале возило под дејство на алкохол, по едно лице биле лишени од слобода во Пробиштип и Кавадарци.

Од МВР информираат дека по целосното документирање на случаите ќе бидат поднесени соодветни кривични пријави.

— реклама —

Воедно, од Министерството апелираат до сите учесници во сообраќајот да ги почитуваат сообраќајните правила и прописи, да не управуваат возило без положен возачки испит, доколку имаат изречена забрана за управување или доколку се под дејство на алкохол, со цел заеднички да придонесат за побезбеден сообраќај.