МВР приведе 15 возачи без возачка дозвола, меѓу нив и тројца малолетници

Полициските службеници во текот на изминатото деноноќие лишиле од слобода 15 возачи на територијата на целата држава поради безобѕирно управување со возило, при што било утврдено дека сите возеле без возачка дозвола.

— реклама —

Како што информираат од Министерството за внатрешни работи, меѓу приведените има и тројца малолетници, додека двајца од возачите претходно учествувале и во сообраќајни незгоди.

Според податоците на МВР, пет лица биле приведени во Тетово, од кои двајца се малолетници, тројца во Скопје, двајца во Прилеп, меѓу кои еден малолетник, а по едно лице во Делчево, Штип, Гевгелија, Зајас и Демир Хисар.

— реклама —

Од полицијата посочуваат дека еден од малолетниците во Тетово, како и уште еден од приведените возачи, претходно биле учесници во сообраќајни незгоди.

— реклама —

По целосното документирање на случаите, против сите ќе бидат поднесени соодветни кривични пријави.

Од МВР упатија апел до сите учесници во сообраќајот да ги почитуваат сообраќајните правила и прописи, да не управуваат возила без положен возачки испит, доколку им е изречена забрана за управување или ако се под дејство на алкохол.

— реклама —

„Да придонесеме заеднички за побезбеден сообраќај“, порачуваат од Министерството за внатрешни работи.