Полициските службеници во текот на изминатото деноноќие лишиле од слобода 15 возачи на територијата на целата држава поради безобѕирно управување со моторни возила, информираат од Министерството за внатрешни работи.
Од приведените, 13 управувале возила без возачка дозвола, при што двајца од нив биле малолетници, додека две лица биле затекнати како возат под дејство на алкохол.
Во Скопје, шест лица, меѓу кои и еден малолетник, биле затекнати како управуваат возило без возачка дозвола. Во Битола биле приведени две лица, од кои едното малолетно, додека по едно лице без возачка дозвола било затекнато во Делчево, Штип, Куманово, Неготино и Македонски Брод.
Дополнително, по едно лице во Скопје и Велес управувале возило под дејство на алкохол.
Од МВР информираат дека по целосното документирање на случаите против сторителите ќе бидат поднесени соодветни кривични пријави.
Министерството повторно апелира до сите учесници во сообраќајот да ги почитуваат сообраќајните правила и прописи и да не управуваат возило без положен возачки испит, доколку имаат изречена забрана за управување или доколку се под дејство на алкохол, со цел зголемување на безбедноста во сообраќајот.
