МВР со превентивни акции за безбеден сообраќај, заштита од пожари и спречување бесправна сеча

Министерството за внатрешни работи информира дека во повеќе градови низ државата биле спроведени превентивни активности насочени кон зголемување на безбедноста во сообраќајот, како и заштита од пожари и незаконска сеча на дрва.

— реклама —

Во Гевгелија, полициски службеници од ОВР Гевгелија, во соработка со Републичкиот совет за безбедност на сообраќајот на патиштата и мото-клубови од градот, реализирале акција „Вози безбедно на мотор“. На возачите им било укажувано на почитување на сообраќајните правила и задолжително носење заштитен шлем, како за возачите, така и за сопатниците.

— реклама —

Во Штип и Свети Николе, полициски службеници од СВР Штип спровеле активности за правилно паркирање и користење сигурносен појас. На граѓаните им било посочено дека користењето сигурносен појас е законска обврска и значително придонесува за личната безбедност. Во рамките на акцијата бил поделен и едукативен материјал изработен во соработка со Републичкиот совет за безбедност на сообраќајот и Факултетот за безбедност – Скопје.

— реклама —

Во Берово и Пехчево, пак, биле реализирани превентивни активности за спречување пожари и незаконска сеча на шуми. Полициските службеници разговарале со граѓаните за потребата од совесно однесување и заштита на шумскиот фонд, а им било укажано и дека бесправната сеча и предизвикувањето пожари претставуваат кривични дела казниви со закон.

Во акциите бил поделен и печатен едукативен материјал, изработен во соработка со ЈП „Национални шуми“.