МВР уапси 11 возачи за безобѕирно управување, меѓу нив и 14-годишник

Меѓу 11-те возачи што биле лишени од слобода во изминатото деноноќие поради безобѕирно управување возило има и малолетници, лица што возеле под дејство на алкохол, како и возачи кои не ја почитувале изречената забрана за управување, соопшти Министерството за внатрешни работи.

Според МВР, полициските службеници постапувале на различни локации низ државата, а против сите осомничени се преземаат мерки поради сомнение за сторено кривично дело „безобѕирно управување возило“ од член 297-а од Кривичниот законик.

— реклама —

Петмина од приведените управувале возила без положен возачки испит. Станува збор за 23-годишната А. Џ., Е. З. (26), Б. Д. (51) и 16-годишник, сите од Скопје, како и 14-годишник од селото Добрино, скопско.

— реклама —

Двајца возачи биле затекнати зад воланот под дејство на алкохол. Тоа се М. С. (42) од селото Уларци, во Општина Чешиново – Облешево, и Д. Е. (64) од Неготино, кој предизвикал и сообраќајна незгода со материјална штета.

Тројца други возачи управувале возила и покрај активната забрана за возење. Станува збор за А. С. (36) од Битола, Р. Р. (26) од кичевско и М. Д. (21) од Кавадарци. Последниот, покрај забраната, бил и под дејство на алкохол.

— реклама —

Меѓу приведените е и М. Н. (34) од Црна Гора, кој управувал патничко возило со брзина поголема од дозволената.

Од МВР информираат дека по целосното документирање на случаите ќе бидат поднесени соодветни кривични пријави.

Од Министерството упатуваат апел до сите учесници во сообраќајот да ги почитуваат правилата и прописите, да не управуваат возило без положен возачки испит, со изречена забрана или под дејство на алкохол, со цел заеднички да придонесат за поголема безбедност на патиштата.