Беки Џонс имала само 21 година кога ѝ било кажано дека има тумор на мозокот и дека ѝ остануваат уште неколку месеци живот. Дијагнозата ја поставил искусен онколог, по што започнала повеќе од еднодецениско лекување со хемотерапија. Денес, на 33 години, дознала дека никогаш немала рак, туку воспаление на мозокот кое можело да се лекува со стероиди.
Џонс е една од повеќе од 40 пациенти кои покренале тужба против болницата University Hospitals Coventry and Warwickshire (UHCW), поради, како што тврдат, долготрајно или непотребно лекување.
„Постојано ми повторуваа дека ќе умрам ако не примам хемотерапија“, вели Џонс. Таа редовно имала мачнини, не можела да учествува на семејни настани, кариерата ѝ била прекината и постојано живеела во страв.
Џонс тврди дека професорот Ијан Браун од болницата во Ковентри ѝ кажал дека лекот темозоломид (ТМЗ) ќе мора да го зема до крајот на животот. Тоа, според неа, било спротивно на упатствата според кои се препорачуваат најмногу шест циклуси на лекување во период од шест месеци.
Кога прашувала зошто бројните снимки не покажуваат знаци на тумор, ѝ било одговорено дека тој „не се гледа со голо око“.
Вистината ја дознала во 2025 година, кога започнала проверка на случаите на пациенти на професорот Браун.
„Никогаш немав тумор на мозокот. Добив погрешна дијагноза и поголемиот дел од возрасниот живот го поминав на терапии без никаква причина“, изјавила таа, додавајќи дека лекарот „практично ѝ го уништил животот“.
И други пациенти на Браун за Би-Би-Си изјавиле дека со години примале ТМЗ. Една пациентка смета дека поради лекот останала неплодна, додека друга развила леукемија по дури 100 непотребни циклуси на терапија.
Во 2012 година, кога Џонс имала 21 година, работела како оператор на видеонадзор на стадион во Ковентри, каде што го запознала својот партнер Пит. По појавата на силни мигрени побарала лекарска помош, а приватен неврохирург извршил биопсија на мозокот.
Нејзината адвокатка Фиона Тинсли тврди дека професорот Браун дијагностицирал глиобластом од четврти степен, еден од најагресивните облици на рак на мозокот, уште пред да пристигнат резултатите од биопсијата. Би-Би-Си повеќепати се обидел да стапи во контакт со пензионираниот професор, но без успех.
Годините поминати на хемотерапија Џонс ги опишува како „ужасни“. Имала постојани мачнини, болки во стомакот, рани во устата и секојдневен замор. Поради страв од инфекции избегнувала дружења и семејни собири. Ѝ била одземена возачката дозвола, а подоцна повторно ѝ било ограничено возењето.
„Пред терапијата постојано одев во теретана, трчав, а Пит и јас често одевме на вечера. Подоцна веќе не можев“, раскажала таа.
На неа и на партнерот им било кажано и дека нема да може да има деца. Сепак, Џонс подоцна родила две деца.
Терапијата траела повеќе од една деценија, сè до 2024 година, кога ненадејно добила повик дека хемотерапијата се прекинува. Не ѝ била дадена причина, освен информацијата дека Браун заминал во пензија.
Во мај 2025 година, по независна анализа што за нејзините адвокати ја извршиле неврохирурзи и радиолози, Џонс дознала дека никогаш немала рак на мозокот. Всушност, имала тумефактивна демиелинизација – воспаление кое вообичаено се лекува со силни стероиди.
Прелиминарните наоди од ревизијата на Кралскиот колеџ на лекари покажале дека пациенти во болницата рутински примале долготрајна терапија со ТМЗ, при што имало „малку или воопшто немало докази за корист“. Во извештајот се наведува дека пропустите на персоналот претставуваат „предавство на довербата на пациентите“.
Од 20 прегледани случаи, 15 биле оценети како „генерално незадоволителни“. Ревизијата утврдила и недостиг на докази за разбирање и документирање на ризиците од долготрајното земање на лекот, како и недоволна соработка меѓу лекарите.
Џонс вели дека наодите се „морничави“ и прашува како било дозволено еден лекар толку долго да работи без соодветен надзор.
Од болницата UHCW соопштиле дека сите засегнати пациенти биле прегледани од искусни лекари и дека им биле обезбедени соодветни планови за грижа. Болницата најавила и независна ревизија на своите системи за пријавување неправилности, а целосниот извештај од ревизијата ќе биде разгледан кога ќе биде објавен.
