Национални шуми оштетени за над 280.000 денари, поднесена кривична пријава

Од МВР информираат дека Надворешната канцеларија за криминалистички работи Струга поднела кривична пријава против В.Р. (56), З.П. (61) и А.А. (60), сите од општина Вевчани, поради сомнение за сторени кривични дела „злоупотреба на службена положба и овластување“ и „несовесно работење во службата“.

— реклама —

Според полицијата, првопријавениот, како раководител во Подрачно шумско стопанство „Јабланица“ – Струга, не извршил соодветен надзор врз постапките за сеча, транспорт и наплата на дрвна маса, со што, како што се наведува, не спречил незаконски активности и овозможил стекнување противправна имотна корист.

— реклама —

Второпријавениот, како референт за користење, заштита и одгледување на шуми во ПШС „Јабланица“, пропуштил должен надзор врз сечата и транспортот на дрвната маса.

— реклама —

Третопријавениот, референт за сеча и дотур, искористувајќи ја службената положба, издавал испратници за превоз на бесправно исечена дрвна маса директно на физички лица, иако, како што се наведува, бил свесен дека тоа е спротивно на законските и подзаконските акти за шумско работење и жигосување на дрва.

Со ваквите дејствија, според МВР, е причинета материјална штета на ЈП „Национални шуми“ и државниот буџет во износ од 280.436 денари.