Незаконски поставени риболовни мрежи се пронајдени и отстранети од Мавровското Езеро при редовна контрола спроведена од овластени лица на Националниот парк „Маврово“.
За случајот е известена Полициската станица во Маврови Анови, а во координација со надлежните институции се преземаат мерки за утврдување на околностите и одговорноста.
Од Националниот парк најавуваат дека контролите на езерото ќе продолжат со цел заштита на рибниот фонд и спречување на незаконското користење на природните ресурси.
Граѓаните, риболовците, посетителите и љубителите на природата се повикуваат да пријават незаконски риболов, поставување мрежи или други активности со кои се загрозува природата. Од паркот посочуваат дека сите утврдени прекршувања ќе бидат документирани и пријавени, а сторителите ќе одговараат согласно со закон.
Од Националниот парк „Маврово“ нагласуваат дека заштитата на езерото е заедничка одговорност на институциите и граѓаните.
