Нешто повеќе од еден месец по прогласувањето на епидемијата на ебола во Демократска Република Конго, бројот на потврдени случаи надмина илјада, соопштија властите во земјата.
Според Министерството за информирање во Киншаса, досега се потврдени 1.003 случаи на заболени од ебола во три провинции, при што починале 254 лица. Во меѓувреме, 100 пациенти закрепнале од болеста.
Во моментов, 365 лица се лекуваат во болници и изолациски одделенија, а стапката на смртност изнесува околу 25 проценти. Податоците се однесуваат на состојбата заклучно со саботата и беа објавени на социјалната мрежа X.
Од прогласувањето на епидемијата во мај, во соседна Уганда се регистрирани уште 19 случаи на заразени со ебола, од кои две лица починале. Властите посочуваат дека овие случаи се поврзани со епидемијата во Конго.
Надлежните информираат дека во моментов се следат околу 58 проценти од контактите на потврдените случаи. Сепак, според Светската здравствена организација, за успешно спречување на ширењето на вирусот потребно е да се идентификуваат и следат најмалку 90 проценти од сите контакти на заразените лица.
Од Африканскиот центар за контрола и превенција на болести повеќепати изразија загриженост поради големиот број лица кои биле во контакт со заразени, а не се под здравствен надзор.
Еболата е исклучително опасна заразна болест која се пренесува преку физички контакт и контакт со телесни течности. Експертите предупредуваат дека актуелната епидемија е особено тешка за контролирање, бидејќи сè уште не постојат вакцина или специфична терапија за вирусот ебола од типот Бундибугио.
