Над 100.000 Украинци во САД во неизвесност: Трамп не кажува дали ќе можат да останат

Повеќе од 100.000 украински државјани кои живеат и работат во Соединетите Американски Држави се соочуваат со неизвесност околу нивниот престој, бидејќи на 19 октомври истекува официјално наведениот рок на привремената заштита што им овозможува легално да останат во земјата. Администрацијата на американскиот претседател Доналд Трамп сè уште нема соопштено дали ќе го продолжи или укине нивниот статус, објавува „Политико“.

Станува збор за програмата за привремен заштитен статус, позната како ТПС (Temporary Protected Status), која САД ја доделуваат на државјани од земји погодени од војни, природни катастрофи и други вонредни околности.

Според последната официјална проценка, со оваа програма се опфатени околу 103.700 Украинци, кои благодарение на неа имаат право на престој и работа во САД.

Иако на официјалните американски интернет-страници како датум на истекување на заштитата сè уште стои 19 октомври 2026 година, дел од имиграциските правници сметаат дека статусот веќе е автоматски продолжен до 19 април 2027 година.

— реклама —

Американското законодавство предвидува автоматско продолжување на привремената заштита за најмалку шест месеци доколку секретарот за внатрешна безбедност навреме не утврди дека земјата повеќе не ги исполнува условите за програмата.

Рокот за донесување таква одлука истекол уште во август, односно 60 дена пред предвидениот крај на заштитата. Бидејќи не била објавена официјална одлука, правните експерти сметаат дека продолжувањето треба да настапи по сила на закон.

Сепак, отсуството на јасно известување од американските институции отвора прашања за важноста на работните дозволи и другите документи што ги поседуваат украинските државјани.

Тоа значи дека десетици илјади луѓе би можеле да се најдат во правна неизвесност, дури и доколку не започне нивно присилно враќање во Украина.

— реклама —

Според „Политико“, слична ситуација неодамна се случила и со државјаните на Ел Салвадор, откако американската администрација не донела навремена и јасна одлука за нивниот привремен заштитен статус.

Во меѓувреме, група од 31 американски сенатор од двете најголеми партии побарала администрацијата на Трамп да ја продолжи заштитата за Украинците за дополнителни 18 месеци и да овозможи програмата да опфати и други украински државјани.

Меѓу потписниците на барањето се републиканските сенаторки Лиса Мурковски и Сузан Колинс, како и демократската сенаторка Џин Шахин.

— реклама —

Сенаторите оцениле дека актуелните околности во Украина јасно го оправдуваат продолжувањето на привремената заштита, предупредувајќи дека нејзиното укинување би можело да принуди илјадници луѓе да се вратат во земја во која војната сè уште трае.

Тие посочиле и дека украинските државјани опфатени со програмата работат во здравството, градежништвото, транспортот и други стопански сектори, придонесувајќи со милијарди долари годишно во американската економија.

Во Конгресот оваа недела бил претставен и предлог-закон со кој привремениот заштитен статус за Украинците би бил гарантиран до јуни 2029 година.

Предлогот има поддршка од претставници на двете партии, меѓу кои демократите Џејсон Кроу и Бил Китинг и републиканецот Брајан Фицпатрик. Слична иницијатива во Сенатот ја поддржуваат Лиса Мурковски и демократскиот сенатор Ричард Блументал.

Сепак, законот сè уште не е усвоен и е доставен на разгледување до надлежниот комитет на Претставничкиот дом.

Во Републиканската партија постојат поделени ставови околу продолжувањето на програмата. Дел од републиканците сметаат дека војната во Украина е доволна причина за продолжување на заштитата, додека други се залагаат за ограничување или целосно укинување на ваквите програми.

Администрацијата на Трамп во текот на годинава веќе преземала мерки за укинување на слични форми на привремена заштита за државјани на повеќе земји.

За околу 103.700 Украинци кои во моментов се опфатени со програмата, најважното прашање останува дали американските власти официјално ќе го потврдат нивниот правен статус и правото на работа по 19 октомври.