ОВР Прилеп поднесе кривична пријава против Г.К. (46) и Л.К. (54), двајцата од Прилеп, како и против правно лице од градот, поради сомнение за сторување продолжени кривични дела поврзани со злоупотреба на службената положба и овластувања, фалсификување службена исправа и фалсификување или уништување деловни книги.
Според информациите од Министерството за внатрешни работи, првопријавениот, во својство на финансиски директор во АД „Тутунски комбинат Прилеп“ – акционерско друштво со доминантен државен капитал, во периодот од 2021 до крајот на 2024 година, во договор со второпријавениот, управител на приватно правно лице од Прилеп, примал и одобрувал невистинити фактури и испратници за наводно извршени услуги.
Како што се наведува, фактурите биле изготвувани и заверувани од второпријавениот, без доказ дека услугите навистина биле извршени и без потпис за прием од вработени во Тутунскиот комбинат. И покрај тоа, финансискиот директор ги задолжувал службите за сметководство да ги евидентираат како обврски во книговодствената евиденција, по што документите ги повлекувал и ги одобрувал за исплата.
Дополнително, од 31 мај 2023 година, исплатите на спорните фактури ги вршел преку сметка на друштвото на која бил единствен овластен потписник. Според Статутот на компанијата, ваквиот начин на исплата бил предвиден исклучиво за интервентни ситуации.
Со ваквите дејствија, според истрагата, биле исплатени вкупно 1.439.573 денари во корист на правното лице од Прилеп. Од оваа сума, 874.540 денари биле исплатени преку сметката на која првопријавениот бил единствен потписник.
Полицијата презема натамошни мерки за целосно расчистување на случајот.
