Основното јавно обвинителство Гевгелија поднесе обвинителен предлог против едно лице, кое се товари за кривичните дела „Телесна повреда“ и „Загрозување на сигурноста“, сторени при семејно насилство. Обвинителството побара и определување мерка притвор.
Според обвинението, ноќта меѓу 18 и 19 јули, по вербална расправија во семејниот дом околу тестаментот што го потпишала мајката на оштетената, обвинетиот почнал да ја навредува својата сопруга, а потоа и физички ја нападнал.
Тој ја удирал со тупаници и клоци по главата и телото, при што ѝ нанел повеќе телесни повреди, односно крвни подливи.
Следната вечер, на 19 јули, откако оштетената го пријавила случајот во полициска станица и заминала да престојува во куќата на својата ќерка, обвинетиот испратил СМС-порака на телефонот на ќерката со заканувачка содржина.
Според Обвинителството, во пораката навел дека, доколку неговата сопруга не се врати дома, купил 10 литри бензин и ќе ја запали куќата. Со заканата, кај оштетената и нејзината ќерка предизвикал чувство на страв, несигурност и загрозеност.
Јавниот обвинител побарал притвор, имајќи предвид дека обвинетиот новите кривични дела ги сторил во период кога сѐ уште му трае рокот на проверка од една година од претходно изречена условна осуда од три месеци затвор за истото кривично дело – „Загрозување на сигурноста“. Според Обвинителството, овие околности укажуваат дека е неопходно тој да остане во притвор додека трае постапката.
