Напади врз сопруги, деца и членови на семејството: Десет пријави за семејно насилство

Десет случаи поврзани со семејно насилство, физички напади, закани и непочитување судски забрани за приближување до членови на семејството се евидентирани во полицискиот билтен.

Во Македонски Брод е поднесена кривична пријава против 56-годишен маж кој, според пријавата, на 6 ноември физички ја нападнал сопругата и барал од неа да ја повлече претходната пријава за семејно насилство, за која имале закажано судско рочиште.

— реклама —

Кривична пријава е поднесена и против 38-годишен жител на Кочани, кој на 17 октомври, според пријавеното, се однесувал агресивно кон сопругата и му се заканувал на својот 18-годишен син.

Во Струмица полицијата го лишила од слобода 27-годишниот В.Д. од струмичко, по пријава дека физички ја нападнал сопругата. Во Битола, 21-годишна жена пријавила дека била нападната од партнерот, кој, според нејзините наводи, подолг период физички и психички ја малтретирал и ѝ се заканувал.

— реклама —

Во Радовиш бил приведен 19-годишник по пријава дека физички ја нападнал својата 70-годишна баба, додека во Битола бил лишен од слобода и 22-годишен маж поради напад врз неговата 22-годишна вонбрачна партнерка.

Кривична пријава е поднесена и против 34-годишен жител на Гостивар поради сомнение за загрозување на сигурноста и демнење. Според пријавата, на 4 ноември тој ѝ испраќал заканувачки пораки преку мобилна апликација на сопругата со која е во бракоразводна постапка и ја снимал со мобилен телефон.

— реклама —

Во Гевгелија била приведена 33-годишна жена од гевгелиско, по пријава дека физички го нападнала поранешниот партнер.

Полицијата во Велес извршила службен разговор со 70-годишна жена по пријава дека не ја почитувала судската забрана за приближување, закани и малтретирање на нејзиниот 66-годишен девер, кому повторно му се заканувала.

— реклама —

Кривична пријава е поднесена и против 33-годишен жител на Тетово, кој, според пријавата, на 14 октомври му се заканувал на сопругата додека се возеле во нивното возило.

Од МВР информираат дека за дел од случаите се преземаат мерки за нивно целосно расчистување, а по документирањето ќе следуваат соодветни пријави.