Повеќе од 14.500 матуранти ќе го започнат полагањето на екстерните испити од државната матура следната сабота, на 6 јуни, соопшти Државниот испитен центар (ДИЦ).
Според податоците на ДИЦ, во учебната 2025/2026 година се пријавени вкупно 14.587 ученици, од кои 12.184 за државна матура, 2.276 за државна стручна матура и 127 за државна уметничка матура.
Првиот екстерен испит ќе започне во 9 часот, а матурантите ќе полагаат странски јазик, математика или историја, во зависност од видот на матурата. Најголем интерес има за англискиот јазик, за кој се пријавени 13.208 кандидати.
Задолжителниот испит по мајчин јазик и литература ќе се одржи на 11 и 12 јуни. Македонски јазик ќе полагаат 9.810 ученици, албански јазик 4.199, турски јазик 360, а српски јазик пет кандидати.
Од Државниот испитен центар информираат дека подготовките за спроведување на матурските испити се одвиваат според планираната динамика и дека се обезбедени услови за фер и непречено полагање.
За реализација на испитите ќе бидат ангажирани околу 2.500 тестатори и 200 набљудувачи, а во просториите каде што ќе се полага матурата ќе биде забрането користење мобилни телефони и други електронски уреди.
