Министерството за образование и наука ги објави конечните резултати од јунската матурска сесија, два месеци по полагањето на првиот екстерен испит и по разгледувањето на сите поднесени приговори.
Просечната оценка од трите типа матура годинава изнесува 3,66. Кај државната матура просекот е 3,62, кај државната стручна матура 3,91, а кај државната уметничка матура 3,59.
Министерката за образование и наука, Весна Јаневска, изјави дека е задоволна од постигнатите резултати, истакнувајќи дека тие се речиси идентични со минатогодишниот просек од 3,69 и значително подобри во споредба со 2024 година, кога просечната оценка изнесувала 3,26.
„Ценам дека ова се објективни резултати поради подготвеноста на сите вклучени во организирањето на матурата“, изјави Јаневска.
За полагање на екстерните испити во јунската сесија биле пријавени 14.587 матуранти, кои го завршиле средното образование во учебната 2025/2026 година. Од нив, 12.184 полагале државна матура, 2.276 државна стручна матура, а 127 ученици државна уметничка матура.
На испитите не се појавиле 348 ученици, што претставува 2,39 проценти од вкупно пријавените.
Годинава за првпат се полагаа три различни типа матурски испит – државна, државна стручна и државна уметничка матура.
Најголем интерес имало за предметот англиски јазик, кој го избрале 13.208 ученици. Освен него, матурантите, во зависност од типот на матурата, можеа да полагаат и математика, француски, германски, руски и италијански јазик, како и историја кај државната уметничка матура.
