Новата учебна 2026/2027 година започнува утре, а наставата за повеќе од 238 илјади ученици ќе трае до 10 јуни. За матурантите учебната година завршува на 17 мај, информираше министерката за образование и наука Весна Јаневска.
На прес-конференција, Јаневска посочи дека учебниците се навреме обезбедени за сите ученици, училишната мрежа е оптимизирана, а во повеќе училишта се подобрени условите за настава.
„Трета година по ред, учебниците се навремено набавени во тираж кој го побараа училиштата. Истите се испорачани и уште утре можат да им бидат поделени на учениците“, рече Јаневска.
Годинава се набавени 622 илјади учебници, при што, според министерката, се остварени заштеди од 50 милиони денари во споредба со годината пред таа да го преземе раководењето со Министерството.
Целосно нови учебници во полн тираж се обезбедени за прво, второ и трето одделение, како и за осмо одделение и втор клас во гимназиското образование, каде што ќе се применуваат нови наставни програми.
Едносменска настава ќе се реализира во 620 од вкупно 1.023 училишни објекти во основното и средното образование. Јаневска посочи дека Владата го поддржува овој концепт бидејќи, како што оцени, овозможува подобра концентрација на часовите, поголема социјализација и повеќе време за совладување на наставниот материјал и стекнување соодветни вештини.
Во моментов се прошируваат капацитетите на 14 училишта во Центар, Карпош, Аеродром, Ѓорче Петров, Бутел, Илинден, Гази Баба и Градско, а во следните неколку месеци е планиран почеток на уште 15 проекти.
Завршени се реконструктивни активности во околу 20 училишни објекти и спортски сали, додека се градат и четири нови спортски сали. Преку владината програма за финансирање капитални проекти во општините, во тек е реализација на околу 50 инвестиции за изградба и реконструкција на училишта, спортски сали и училишни базени.
За учениците со посебни образовни потреби ангажирани се 1.358 образовни асистенти во основното и 166 во средното образование.
Јаневска информираше и дека учениците кои подолго време се на болничко или домашно лекување ќе можат да се вклучат онлајн во наставата со својата паралелка или наставникот индивидуално да работи со нив.
Наставниците и другите вработени во училиштата во март 2027 година ќе добијат ново зголемување на платите од 7,5 до 10 проценти, во зависност од стапката на инфлација. Според Јаневска, тоа е согласно договорот со СОНК од пред две години, преку кој досега платите пораснале за повеќе од 20 проценти.
Министерката посочи и дека околу 300 наставници и стручни соработници напредувале во звањата ментор и советник, што носи и повисоки лични примања.
Во новата учебна година продолжува и поддршката за талентираните ученици. МОН целосно ќе ги покрива трошоците за патување и учество на меѓународни научни олимпијади, додека во октомври ќе бидат објавени конкурсите за ученички стипендии.
Според пристигнатите податоци во МОН, учебната година ќе ја започнат околу 238 илјади ученици – 174 илјади основци и 64 илјади средношколци. Во училишните клупи за првпат ќе седнат 14.952 првачиња.
Поради недостиг на запишани ученици, од септември привремено ќе бидат затворени 26 подрачни училишта. Вкупно 148 училишни објекти во земјата, главно во руралните средини, во моментов се празни.
Намалувањето на бројот на ученици доведе и до оптимизација на паралелките. Како што објасни Јаневска, помалите паралелки се спојуваат или се приклучуваат кон поголеми, со цел учениците да учат во поголеми групи и да имаат повеќе можности за социјализација и натпреварување.
Со оптимизацијата, бројот на паралелки годинава ќе биде намален за 433 – 222 во основното и 211 во средното образование. Јаневска нагласи дека ниту еден редовно вработен наставник не е отпуштен поради овој процес.
Во септември семејствата ќе можат да купуваат училишен прибор по најмалку 15 проценти пониски малопродажни цени, согласно одлуката на Владата.
Јаневска им посака успешна учебна година на сите ученици, наставници и стручни соработници.
