Бројот на загинати во двата силни земјотреси што ја погодија Венецуела се искачи на 3.535, соопштија властите, додека речиси 18.000 луѓе и понатаму се без покрив над главата, повеќе од една недела по катастрофата.
Според официјалните податоци, во земјотресите со магнитуда од 7,2 и 7,5 степени, што се случија на 24 јуни во интервал од само неколку секунди, повредени се 16.740 лица, а 17.854 се раселени.
Најтешко погодени се главниот град Каракас и крајбрежната област Ла Гуаира, каде што продолжуваат спасувачките и хуманитарните активности.
Властите информираа дека најмалку 12.800 лица се сместени во 80 привремени засолништа во Каракас и Ла Гуаира.
Вршителката на должноста претседател, Делси Родригез, ја бранеше реакцијата на владата, отфрлајќи ги критиките дека помошта пристигнала предоцна. Таа најави формирање нова воена единица која ќе биде задолжена за интервенции при идни природни катастрофи.
Во меѓувреме, Обединетите нации соопштија дека во координација со венецуелските власти продолжуваат да ја прошируваат хуманитарната помош, додека спасувачките тимови и инженерските единици сè уште работат на погодените подрачја.
