Над 35.000 незавршени регистрации во е-Даночни услуги, УЈП ги повика граѓаните да ја комплетираат регистрацијата

Управата за јавни приходи (УЈП) ги повика граѓаните кои имаат незавршена регистрација во системот е-Даночни услуги (Е-ППД) да ја комплетираат постапката, откако биле утврдени повеќе од 35.000 неодобрени кориснички профили.

— реклама —

Од УЈП информираат дека е извршена проверка во системот, при што било констатирано дека голем број граѓани поднеле барање за регистрација на кориснички профил како даночни обврзници – физички лица, но постапката не била завршена до крај.

Со цел да се заокружи процесот, до овие граѓани се испратени персонализирани известувања од електронската адреса info@ujp.gov.mk, со насоки за понатамошните чекори.

— реклама —

УЈП ги повикува сите кои добиле вакво известување да се обратат во надлежната канцеларија на институцијата со важечки документ за лична идентификација, каде што овластено службено лице ќе ја одобри регистрацијата.

— реклама —

Од институцијата потсетуваат дека активниот кориснички профил во системот е-Даночни услуги овозможува користење на електронските услуги преку државниот портал, увид во податоците од Годишната даночна пријава за данок на личен доход, добивање уверение за остварен доход, како и користење на податоците што УЈП ги доставува до други институции при остварување различни права на граѓаните.

Воедно, активниот профил е неопходен и за користење на апликацијата „МојДДВ“, односно за скенирање фискални сметки и остварување на правото за враќање дел од данокот на додадена вредност.

За дополнителни информации, граѓаните можат да се обратат на електронската адреса info@ujp.gov.mk или на телефонските броеви.