Институт за јавно здравје на Србија „Д-р Милан Јовановиќ Батут“ соопшти дека на територијата на Србија од 4 април до 10 мај биле регистрирани 4.031 случаи на заболувања слични на грип.
Според најновите податоци, инциденцата изнесува 60,49 случаи на 100.000 жители, а стапката е за 9,53 отсто пониска во однос на претходната недела.
Од „Батут“ наведуваат дека највисоки стапки и натаму се регистрираат кај децата до четиригодишна возраст, како и кај групата од пет до 14 години.
Епидемиолошките показатели покажуваат дека во Србија е регистрирана географска распространетост на основно, вонепидемиско ниво, додека клиничката активност на грипот останува под епидемискиот праг, со стабилен тренд на инциденца.
Во истиот период, според податоците од сентинелниот надзор над акутните респираторни инфекции, биле регистрирани вкупно 10.237 случаи, со стапка на инциденца од 823,89 на 100.000 жители.
Во извештајната недела не биле лабораториски потврдени случаи на вирус на грип на територијата на Србија.
Според прегледот на состојбата во европскиот регион на Светска здравствена организација, стапките на заболувања слични на грип се над вообичаеното ниво само во Казахстан, додека ниту една земја или област не пријавила зголемени стапки на акутни респираторни инфекции.
„Процентот на позитивност на вирусот на грип изнесуваше еден отсто, што е под епидемискиот праг од 10 проценти“, се наведува во соопштението.
Од „Батут“ потсетуваат дека епидемиолошкиот надзор над грипот за сезоната 2025/2026 започнал на 29 септември 2025 година и дека континуирано се следат епидемиолошките, клиничките и вирусолошките карактеристики на заболувањето.
