Над 50.000 жртви од горештините во Европа, летото 2026 најсмртоносно досега

Екстремните горештини во Европа во текот на летото 2026 година однеле повеќе од 50.000 животи во урбаните средини, покажуваат проценките од ново научно истражување. Според научниците, ова било најсмртоносното лето од почетокот на анализираниот период, а околу две третини од смртните случаи се поврзуваат со климатските промени предизвикани од човечкото дејствување, објави „Еуроњуз“.

Проценетиот број жртви значително ги надминува претходните рекорди од околу 29.000 починати во летото 2022 година и 28.000 за време на топлотниот бран во 2003 година. Меѓу јуни и август, температурите во Западна Европа биле во просек за 2,9 Целзиусови степени повисоки од просекот за периодот од 1991 до 2020 година, а во одредени денови отстапувањето достигнувало и 12 степени.

— реклама —

Речиси една третина од проценетите смртни случаи се случиле за време на особено интензивниот топлотен бран од 17 јуни до 1 јули, кога температурите биле во просек за 5,3 степени повисоки од вообичаените.

Истражувањето опфатило 854 урбани подрачја во Европската Унија, Обединетото Кралство, Норвешка и Швајцарија, во кои живеат околу 40 проценти од населението на овие 30 земји. Научниците користеле температурни податоци и математички модели за да го проценат бројот на дополнителни смртни случаи поврзани со горештините, земајќи ги предвид возраста, социоекономските услови, животната средина и достапноста на здравствените услуги.

— реклама —

Според анализата, околу 32.000 смртни случаи, односно 65 проценти од проценетата смртност поврзана со горештините, може да се припишат на климатските промени предизвикани од човечкото дејствување. На почетокот на векот овој удел изнесувал околу 40 проценти.

Најпогодена земја била Италија, со проценети 13.303 смртни случаи, по што следуваат Франција со 7.268, Шпанија со 6.824, Германија со 6.340 и Обединетото Кралство со 4.354 починати.

— реклама —

Особено загрозени биле повозрасните граѓани, хронично болните и лицата кои немале можност да се заштитат од високите температури. Приближно половина од проценетите жртви биле постари од 85 години, но последици имало и кај помладата популација. Околу 6.000 починати биле помлади од 65 години, меѓу кои приближно 800 лица на возраст од 20 до 44 години.

Научниците предупредуваат дека вистинскиот број жртви од горештините тешко се утврдува, бидејќи високите температури често не се наведуваат како директна причина за смрт. Поради тоа, екстремната топлина ја нарекуваат „тивок убиец“, а многу европски држави сè уште ги немаат објавено конечните податоци за летото 2026 година.

Истражувачката Клер Барнс од Империјал колеџ во Лондон предупредува дека сè потоплите лета имаат сè посериозни последици врз јавното здравје и дека се неопходни итни мерки за заштита на најранливите категории граѓани.

Како можни решенија се посочуваат проширување на зелените површини, создавање јавни климатизирани простории, приспособување на зградите на високите температури и подобрување на системите за рано предупредување. Научниците истовремено повикуваат на намалување на употребата на фосилни горива за да се ограничи натамошното глобално затоплување.