Цените на нафтата бележат раст поради зголемените стравувања дека конфликтот меѓу САД и Иран би можел да продолжи, што дополнително го загрозува снабдувањето со енергенси. Неизвесноста е зголемена откако Иран најави поофанзивен пристап, а Вашингтон ја отфрли можноста за продолжување на привремениот прекин на огнот.
Напредокот во преговорите за прекин на конфликтот и повторно воспоставување на редовниот сообраќај на танкерите низ стратешкиот Ормуски Теснец засега е ограничен. Ограничениот број пловила што минуваат низ теснецот дополнително ги засилува стравувањата на пазарите.
Фјучерсите на суровата нафта „брент“ пораснаа за 27 центи, или 0,3 отсто, на 91,33 долари за барел. Американската нафта ВТИ поскапе за 42 центи, достигнувајќи 85,04 долари за барел.
Според аналитичарите, неизвесноста околу повторното отворање на Ормускиот Теснец е еден од главните фактори што ги поддржуваат повисоките цени. Податоците на „Кплер“ покажуваат дека во саботата низ теснецот поминале само пет товарни бродови, додека во неделата не бил регистриран ниту еден премин. За споредба, на почетокот на претходната недела биле регистрирани 31 брод.
Иран паралелно преговара со Оман за воспоставување безбедна рута за поминување на бродовите и тврди дека разговорите се блиску до договор. Сепак, тензиите во регионот продолжуваат, додека се појавија и информации за тајни комуникации меѓу Вашингтон и припадници на иранската Револуционерна гарда.
Последиците се чувствуваат и на пазарот на горива. Во САД маржата на дизелот надмина 100 долари за барел, што укажува на продлабочување на проблемите со снабдувањето. Меѓународната агенција за енергија претходно процени дека глобалната работа на рафинериите е намалена на 80,9 милиони барели дневно, што е за пет милиони барели дневно помалку од претходната година.
Дополнителен притисок создава и намаленото производство на дизел, бидејќи рафинериите во текот на летото го зголемија производството на бензин и авионско гориво. Русија, пак, поради недостигот предизвикан од нападите врз нејзините рафинерии, го продолжи ограничувањето на извозот на дизел до крајот на годината.
