Цената на нафтата повторно ја надмина границата од 100 долари за барел, зголемувајќи ги стравувањата од нов инфлаторен удар и забавување на светската економија.
Цената на северноморската нафта „брент“ во средата накратко достигна 100,19 долари за барел, што е највисоко ниво од јули. Од почетокот на годината нафтата поскапела за повеќе од 60 отсто, а ова е третпат годинава цената да ја надмине границата од 100 долари.
Новиот скок следува по дополнителното зголемување на тензиите во Персискиот Залив. Американската војска соопшти дека уништила повеќе ирански танкери, додека на ескалацијата ѝ претходеа напади на Хутите врз четири саудиски градови, при што биле повредени повеќе од 70 лица и биле предизвикани пожари во нафтени постројки.
Аналитичарите предупредуваат дека продолжените напади врз саудиската нафтена инфраструктура би можеле да ги загрозат глобалните испораки, особено кон азиските земји, кои во голема мера зависат од увозот на енергенси.
Растат и цените на природниот гас. На средноевропскиот пазар велепродажната цена за еден ден се зголемила од 77,38 на 80,62 евра за мегават-час, односно за 4,2 отсто.
Дополнителен фактор за движењето на цените ќе биде Кина, најголемиот светски купувач на нафта. Кинескиот увоз се зголемил од 7,15 милиони барели дневно во јуни на речиси девет милиони во август. Доколку продолжи растот на побарувачката, тоа би можело дополнително да ги зголеми цените.
Истовремено, глобалното снабдување со дизел е дополнително ограничено поради намалената преработка во руските рафинерии и украинските напади врз енергетската инфраструктура. Според проценките на „CommBank“, глобалниот извоз на дизел во јули бил околу 35 отсто помал во споредба со истиот месец лани.
Аналитичарите очекуваат цените постепено да се стабилизираат во следните 12 месеци, но предупредуваат дека продолжените нарушувања во снабдувањето и зголемената кинеска побарувачка можат да создадат дополнителен притисок врз енергетските пазари.
