Нафтата повторно тргнува кон Црвеното Море: Саудиска Арабија го обновува клучниот нафтовод

Саудиска Арабија повторно започна со работа на нафтоводот Исток-Запад, со што извозот на сурова нафта од пристаништето Јанбу на Црвеното Море би можел да продолжи уште денес, објави „Ројтерс“, повикувајќи се на извори запознаени со ситуацијата.

Според изворите, еден танкер подоцна денеска треба да биде натоварен во Јанбу, а според еден од нив, пратката ќе биде наменета за Кина.

— реклама —

Саудиска Арабија го користи овој нафтовод за пренасочување на околу четири милиони барели нафта дневно кон Јанбу поради нарушувањата во транспортот низ Ормускиот Теснец, предизвикани од војната на Блискиот Исток. Тоа количество претставува околу четири отсто од светската понуда на нафта.

— реклама —

Нафтоводот беше затворен по нападите со беспилотни летала на 13 септември, по што беа прекинати и испораките на сурова нафта од пристаништето Јанбу.

По повторното активирање, нафтоводот работи со намален капацитет. Саудискиот нафтен гигант „Арамко“ настојува протокот да го врати на околу четири милиони барели дневно.

— реклама —

Сепак, според безбедносен извор, за целосно нормализирање на работата може да бидат потребни неколку недели.

Во меѓувреме, трговците се подготвуваат за обновување на саудискиот извоз, пренасочувајќи танкери кон египетските пристаништа Порт Саид и Сиди Керир, каде што е можен и пренос на нафта од еден на друг брод.

Веста за обновувањето на транспортот преку нафтоводот Исток-Запад влијаеше врз цената на нафтата. Цената на „брент“ во 17 часот беше пониска за 0,49 отсто и изнесуваше 99,820 долари за барел.