Цената на нафтата продолжи да расте четврти ден по ред и достигна највисоко ниво во речиси три недели, откако новите несогласувања меѓу Обединетите Арапски Емирати и Иран дополнително ги зголемија тензиите на Блискиот Исток.
Брентот достигна 92 долари за барел, додека американската нафта ВТИ се движеше околу 86 долари. Дополнителен притисок врз пазарот создава и неизвесноста околу иднината на конфликтот, кој трае веќе шест месеци, како и статусот на Ормускиот Теснец.
Обединетите Арапски Емирати соопштија дека ги прекинуваат сите економски врски со Техеран, откако ги обвинија Иран дека истрелал балистички ракети кон нивна територија. Во исто време, американскиот претседател Доналд Трамп изјави дека нема тековни преговори со Техеран.
Дополнителна загриженост на пазарите предизвика и информацијата дека пловен објект што го напуштал Ормускиот Теснец бил погоден од проектил, при што едно лице било повредено. Следењето на бродскиот сообраќај во средата покажало дека три супертанкери поврзани со Кина направиле пресврт во критичната точка во Персискиот Залив.
Растот на цената на суровата нафта започна по избувнувањето на конфликтот на Блискиот Исток кон крајот на февруари, што дополнително ги зголеми инфлаторните притисоци. Врз енергетските пазари влијае и војната меѓу Русија и Украина, особено по нападите врз рафинериите.
Цените на нафтените деривати, а особено на дизелот, растат побрзо од цената на суровата нафта, што создава дополнителен притисок врз возачите, транспортниот сектор, земјоделците и индустријата.
„Следниот раст на цената на нафтата можеби помалку ќе биде поттикнат од уште еден драматичен наслов, а повеќе од стравот на пазарот дека ќе се најде на погрешната страна од физичката трговија“, изјави Пријанка Сачдева, шефица на пазарни анализи во „Филип Нова“.
Во САД се појавија и знаци на намалување на резервите на сурова нафта. Американскиот институт за нафта пријавил умерен пад на националните залихи, вклучително и во складиштето во Кушинг, Оклахома. Се очекува да се намалат и резервите на дестилати, во кои спаѓа и дизелот.
Во меѓувреме, глобалните пазари на дизел остануваат особено затегнати поради нарушените текови од Блискиот Исток и прекинатиот извоз од Москва. Во САД маржата за производство на гориво од сурова нафта надминала 100 долари за барел, достигнувајќи рекордно ниво.
