Професорката Мирјана Најчевска преку објава на социјалните мрежи упати критики кон лидерот на СДСМ, Венко Филипче, потсетувајќи на неговите претходни ангажмани за време на владеењето на ВМРО-ДПМНЕ.
„Чекајте, ова е оној истиот Филипче кој му беше советник на министерот за здравство Никола Тодоров во власта на ДПМНЕ? И оној истиот Филипче кој беше дел од професорскиот контра пленум во служба на режимот на Груевски?“, напиша Најчевска.
Во продолжение таа оцени дека, според неа, меѓу политичките партии во државата нема суштински разлики кога станува збор за односот кон власта и јавните ресурси.
„Во ситуација кога нема никаква разлика меѓу политичките партии кои ги обединува заедничкиот именител – криминалот, можеш да бидеш што сакаш во било која власт. Важно е да има нешто за крадење“, наведува Најчевска во својата објава.
Нејзините коментари доаѓаат во период на засилени политички препукувања меѓу власта и опозицијата околу евроинтеграциите, уставните измени и најавите за формирање на нови политички сојузи.
