Професорката Мирјана Најчевска преку објава на социјалните мрежи ја критикуваше бугарската блокада на евроинтегративниот процес на Македонија, посочувајќи дека станува збор за единствен случај во кој земја-членка на Европската Унија го попречува пристапувањето на соседна држава поради билатерални прашања.
„Британија не го блокирала влезот на Ирска во ЕУ. Грција не го блокирала влезот на Кипар во ЕУ. Романија не го блокира влезот на Молдавија во ЕУ. Само и единствено Бугарија го блокира влезот на Македонија во ЕУ заради билатерални прашања“, напиша Најчевска.
Таа во објавата поставува прашања за односот на Бугарија кон европските вредности, но и за позицијата на Европската Унија во целиот процес.
„Што зборува тоа за Бугарија? И што зборува тоа за ЕУ кога се согласува со блокадата на Бугарија?“, прашува Најчевска.
Нејзината реакција доаѓа во период на засилени дебати околу европскиот пат на Македонија, откако Европскиот парламент го усвои извештајот за напредокот на земјата, во кој останаа референци кон Вториот протокол од Договорот за добрососедство меѓу Македонија и Бугарија.
