Универзитетската професорка Мирјана Најчевска на социјалните мрежи се огласи по инцидентот со опожарените возила во близина на Бугарската амбасада во Скопје, изнесувајќи личен став дека не верува оти зад настанот стојат граѓани од земјава.
„Јас не верувам дека било кој би се занимавал со автомобилите на Бугарите. Има толку горечки прашања кои ги мачат нашите граѓани што едноставно им е гајле за Бугарите и нивните автомобили“, напиша Најчевска.
Таа оцени дека единствената страна која би можела да има корист од ваков инцидент е самата Бугарија.
„Единствен на кој вакво нешто би му било од корист е самата Бугарија, така што лично јас таму би го барала виновникот“, наведе Најчевска.
Нејзината објава следува откако Владата најостро го осуди опожарувањето на возилата со дипломатски статус во близина на Бугарската амбасада и побара брза и ефикасна истрага за целосно расчистување на случајот.
