Повеќе од 1.000 млади, волонтери од земјава, но и од странство, ученици, вработени во јавните градски претпријатија, вчера од зад Владата на кејот на Вардар почнаа да го собираат ѓубрето како дел од акцијата „Генералка викенд“, што ќе трае три дена.
На волонтерите им се придружија претседателката Гордана Сиљановска, министерот за животна средина Муамет Хоџа и неговата заменичка Лашкоска, амбасадорот на Австрија, Мартин Памер, и градоначалникот на Скопје, Орце Ѓорѓиевски.
Професорката Мирјана Најчевска остро ја критикуваше акцијата, оценувајќи дека станува збор за симболична активност без реален ефект врз проблемот со отпадот во државата.
„Поголема глупост не можам да замислам.
Тие ја имаат власта во свои раце. И организацијата наречена држава. И ништо попаметно не можат да смислат од тоа да собираат смет? На најчистиот простор во државата? Додека се множат отворени депонии? Дали и парите што ќе ги добијат за овој ден ќе бидат на ниво на некој што собира смет?
Ова е исто како да имаш на располагање авион, а ти тргаш на пат за Америка на сплав.
Кога ќе излезат амбасадорите на други држави во земјава да собираат смет, тие ѝ порачуваат на државата дека не си ја врши работата. А кога ќе излезе градоначалникот, па и претседателката, тоа значи дека немаат појма што им е работата.
Донесете ИНЦЕНЕРАТОРИИИ и легислатива со драконски казни и градоначалници што знаат како да се грижат за општината во која се избрани. Престанете да глуматате и да замајувате глуп народ“, напиша Најчевска.
