Најмалку 13 работници загинаа, а седуммина се повредени по одрон во илегален рудник за злато во јужниот дел на Колумбија. Несреќата се случила во средата попладне во близина на Поликарпа, во департманот Нарињо.
Според сведоци, непосредно пред одронот се слушнала експлозија во површинскиот дел на рудникот, по што работниците кои биле под земја останале затрупани.
Спасувачките екипи, заедно со жители од околината, со помош на багер ги извлекувале телата на загинатите. Меѓу жртвите има и четворица членови на исто домородно семејство.
Во рудникот, според локалните жители, редовно работеле околу 50 луѓе, од кои најголем дел биле припадници на домородната заедница Квиљасинга.
Несреќите се чести во неформалните и илегалните рудници во Колумбија, каде илјадници луѓе зависат од ископувањето злато и други благородни метали за егзистенција. Според проценките, во земјата меѓу 200.000 и 400.000 луѓе се занимаваат со рударство во мали, неформални рудници.
