Најмалку 14 лица загинаа, а 11 се повредени во експлозија во складиште со оружје и муниција во северозападната сириска покраина Идлиб, соопштија локалните власти.
Експлозијата се случила во близина на градот Сармада, а надлежните предупредија дека бројот на жртвите би можел да се зголеми. Сириското Министерство за одбрана соопшти дека експлодирало привремено складиште во кое било собрано оружје оставено од војната, пред неговото префрлање на други локации.
Од Министерството наведоа дека меѓу повредените има и неколку нивни припадници. Нивните единици, заедно со надлежните служби, работат на обезбедување на подрачјето.
Медицинските извори во Сармада претходно информирале за осум повредени лица. Спасувачките и итните служби продолжуваат да го пребаруваат местото на експлозијата и ја проценуваат причинетата материјална штета.
Несреќата се случи само неколку дена по слична експлозија во складиште со оружје во градот Биниш, исто така во Идлиб, во која имало жртви.
Во Идлиб и соседната покраина Алепо во изминатите години се регистрирани повеќе експлозии во складишта со оружје и муниција. Присуството на големи количества оружје оставено по долгогодишната војна претставува сериозна опасност за цивилното население во овие подрачја.
