Шеснаесетгодишната Британка Аби Линтон, тренерка по навивачки спортови, загина откако туристички брод на кој се наоѓала со семејството експлодирал за време на нивниот одмор во Доминиканската Република.
Несреќата се случила на 27 јули, додека бродот ги враќал туристите од излет на островот Саона кон пристаништето Бајахибе. На пловилото имало околу 30 патници.
Аби се здобила со тешки изгореници и била пренесена во болница, но три дена подоцна починала. Нејзините сестра Карли и брат Бредли, исто така, биле повредени и сè уште се на болничко лекување.
Доминиканските власти соопштија дека во несреќата биле повредени вкупно 24 лица, од кои 11 биле задржани во болница поради изгореници. Причината за пожарот и експлозијата засега не е утврдена, а истрагата е во тек.
Еден од патниците, Навин Торес, кој се здобил со изгореници од прв степен, раскажал дека патниците најпрво слушнале силен звук, сличен на истрел, во моментот кога бродот нагло забрзал. Потоа следувала експлозија.
„Предниот дел од бродот експлодирал. Ми требале неколку секунди да сфатам што се случува, а огнот почнал да се шири кон мене и сопругата“, раскажал тој.
За помош на семејството е започната хуманитарна кампања, во која досега се собрани повеќе од 17.500 фунти.
Од Аби се прости и нејзиниот клуб „Swindon Lightning“, каде што тренирала и работела како тренерка. Од клубот ја опишаа како сакана членка на нивната заедница, позната по добрината, насмевката и поддршката што им ја давала на другите спортисти, тренери и семејства.
