Најмалку 300 училишта во Италија евакуирани по закани за бомби

Најмалку 300 училишта низ Италија денеска биле евакуирани откако добиле идентична заканувачка порака за наводно поставени бомби, соопшти италијанскиот министер за образование, Џузепе Валдитара, пренесува Ројтерс.

— реклама —

Министерот изјавил дека се претпоставува оти станува збор за лажни дојави, но очекува бројот на засегнати училишта да продолжи да расте. По добиената закана, едно училиште во Рим ги известило родителите дека сите ученици се префрлени на безбедно место и се под надзор на наставниот кадар.

— реклама —

Валдитара оценил дека големиот број училишта опфатени со заканите укажува на тоа колку тие се неверодостојни. Електронската порака била потпишана со името „Михаил Андропов, водач на Вилаетот Мизогинистан“.

Истиот наводен испраќач ја презел одговорноста и за заканувачки пораки за поставени бомби, испратени во петокот до редакции на медиуми во Ирска и Бугарија.

— реклама —

Италијанската полиција спроведува истрага за случајот, потврдил портпарол на полицијата во Рим.

— реклама —

Безбедносната тревога се случува во период на зголемена загриженост во Европа поради заканите поврзани со таканареченото хибридно војување, чии мети во изминатиот период биле супермаркети, банки за крв, воздушниот сообраќај и телевизиски куќи.