Најмалку двајца Палестинци загинаа во израелски воздушен напад во Газа

Во нов израелски воздушен напад во јужниот дел на Појасот Газа загинаа најмалку двајца Палестинци, соопштија локалните здравствени власти. Нападот бил извршен врз возило во западниот дел на Кан Јунис, при што биле повредени уште две лица.

Лекарите соопштија дека меѓу загинатите се Осама Хатер и Мохамад Абу Елван.

— реклама —

Израелските власти потврдија дека цел на нападот бил Мохамад Абу Елван, кого премиерот Бенјамин Нетанјаху и министерот за одбрана Израел Кац го опишаа како висок финансиски функционер на Хамас.

— реклама —

„Нема да дозволиме Хамас повторно да ја обнови својата сила и нема да запреме додека Хамас повеќе не постои во Појасот Газа“, се наведува во заедничкото соопштение на Нетанјаху и Кац.

Израелските воздушни напади продолжуваат и покрај прекинот на огнот постигнат со посредство на САД. Договорот, постигнат минатата година, предвидува и обнова на територијата, но преговорите се соочуваат со пречки поради несогласувањата околу условите за разоружување на Хамас и повлекување на израелските сили.

— реклама —

Палестинските власти наведуваат дека повеќе од 73.000 луѓе биле убиени во израелската воена операција во Појасот Газа, која започна по нападот на борците на Хамас во јужен Израел во октомври 2023 година, кога беа убиени околу 1.200 луѓе.

Според податоците на здравствените власти во Газа, од стапувањето на прекинот на огнот во сила досега загинале најмалку 1.400 Палестинци, главно цивили. Израелската армија соопштува дека во истиот период загинале четворица израелски војници.

Израел и Хамас меѓусебно се обвинуваат за прекршување на договорот за прекин на огнот.