Најмалку три лица, меѓу кои две деца и една жена, загинале во израелски напад врз западниот дел на градот Газа, според информации од палестински медицински извори. Во одделен напад во централниот дел на Појасот Газа загинало и уште едно дете, објави Би-би-си.
Нападите следувале откако во областа била откриена операција на специјална единица. Според непотврдени локални информации, акцијата ја спровела палестинска вооружена група која има поддршка од Израел. По откривањето на операцијата, израелските сили започнале со гранатирање и воздушни напади.
Снимките од градот Газа покажуваат хаос и последици од нападите, а на нив се слуша и пукање.
Според првичните информации од теренот, специјална единица се инфилтрирала во густо населена област со комби и мотоцикли. Засега не е потврдено дали во операцијата директно учествувале израелски сили или палестинската група.
Локален извор за Би-би-си изјавил дека веројатна цел бил висок безбедносен функционер на Хамас. Израелскиот министер за одбрана, Израел Кац, соопштил дека е уапсен висок функционер на организацијата, но не е потврдено дали станува збор за лицето што било цел на операцијата во градот Газа.
Израелската армија потврди дека погодила повеќе цели во Газа, со образложение дека целта била отстранување на заканите за нејзините сили. Од армијата соопштиле дека нема повредени израелски војници и дека биле изведени и напади со дронови за да се обезбеди извлекувањето на единицата од теренот.
