Најмногу се зголемени цените на авио-картите, а цените на храната се зголемени за 1%, вели Мицкоски

Премиерот Христијан Мицкоски изјави дека Владата има ограничен простор за интервенции во однос на растот на цените, оценувајќи дека замрзнувањето на цените и маржите не е добро решение.

Одговарајќи на новинарско прашање дали се планираат мерки за храната, Мицкоски рече дека Владата ги анализира податоците од Државниот пазарен инспекторат и дека зголемувањето на цените на месечно ниво е релативно ниско.

— реклама —

„Бројките што ги добиваме за цените на храната на месечно ниво, април наспроти март, се некаде под 1% зголемени. Најмногу се зголемени транспортните услуги, особено кај нискобуџетните авиопревозници и картите, што влијае врз крајната инфлација“, изјави премиерот.

— реклама —

Тој посочи дека инфлациски притисоци има и во регионот, наведувајќи дека во Бугарија инфлацијата е над 6%, во Хрватска околу 6%, а во Грција околу 5%.

„Нема како ние да останеме имуни на ова, имајќи предвид дека лани во овој период имавме и Велигденска кошница“, рече Мицкоски.

— реклама —

Премиерот очекува стабилизација на цените во наредниот период, со проекција инфлацијата да падне под 4%, а до крајот на годината да се движи меѓу 2 и 3 проценти, особено доколку се стабилизира ситуацијата на Блискиот Исток.

— реклама —

На дополнително прашање дали Владата има конкретни мерки, тој кратко одговори: „Има, да“, но појасни дека просторот за маневар е ограничен.

„Немаме ние простор голем како влада, освен да влијаеме на данокот на додадена вредност. Ако ги замрзнеме цените и маржите, тие ќе се прелеат во другите месеци и тоа се покажа како лоша мерка“, изјави Мицкоски.