Најстудено утрово било во Лазарополе каде се измерени 4 степени, додека 5 степени се регистрирани на Попова Шапка и во Маврови Анови, информираат од Управата за хидрометеоролошки работи.
Минимални 6 степени се измерени во Берово и Крива Паланка, 7 во Крушево, Претор и Тетово, додека во Скопје-Петровец, Битола, Охрид и Прилеп се измерени 8 степени.
Во Штип и Демир Капија утринската температура изнесувала 9 степени, а 10 степени биле измерени во Куманово, Велес, Струмица, Виница, Кавадарци и Скопје-Зајчев Рид. Најтопло утрово било во Гевгелија со 12 степени.
Во изминатите 24 часа најмногу дожд наврнал во Крушево, каде се измерени 9 литри на метар квадратен. Во Маврови Анови наврнале 3 литри, на Попова Шапка 2, а во Битола, Берово, Прилеп и Претор по 1 литар на метар квадратен.
Времето денеска ќе биде променливо облачно и потопло со сончеви периоди. Попладне ќе има услови за повремен локален слаб дожд и ретки грмежи. Ќе дува слаб до умерен ветер од западен и северозападен правец.
Максималната дневна температура ќе се движи од 21 до 27 степени.
Во Скопје ќе биде променливо облачно со сончеви периоди и слаб променлив ветер, а дневната температура ќе достигне до 25 степени.
