По повод 2 Август – Илинден, Денот на Републиката, претседателот на Уставниот суд, Дарко Костадиновски, упати честитка до граѓаните, во која порача дека денес највисок патриотизам претставува посветеноста на владеењето на правото, почитувањето на Уставот и јакнењето на правната држава.
Во честитката тој потсетува дека годинава се одбележуваат 123 години од Илинденското востание и 82 години од Првото заседание на АСНОМ.
„Денес, кога одбележуваме 123 години од Илинденското востание и 82 години од Првото заседание на АСНОМ, со длабока почит се поклонуваме пред визионерството, храброста и жртвата на генерациите кои ги поставија темелите на македонската државност“, наведува Костадиновски.
Тој истакнува дека идеалите на илинденците и на асномската генерација обврзуваат на создавање просперитетна, современа и правна држава, во која институциите ќе постапуваат одговорно, а граѓаните ќе имаат доверба дека нивните права и слободи се заштитени.
„Чин на највисок патриотизам денес претставува вистинската посветеност на владеењето на правото, почитувањето на Уставот и јакнењето на правната држава“, порачува претседателот на Уставниот суд.
Според него, силата на Уставот зависи од посветеноста на секој граѓанин да го штити.
„Само доколку секој од нас ја чувствува таа должност, уставните права и слободи ќе бидат вистински заштитени, а правната држава ќе биде наша заедничка реалност“, наведува Костадиновски.
Во честитката тој повикува на единство околу уставниот поредок и владеењето на правото.
„Денес повеќе од кога било, потребно е повторно да учиме да бидеме обединети околу Уставот, владеењето на правото и заедничката одговорност кон Републиката“, истакнува тој.
Костадиновски додава дека илинденската идеја не завршува со освојувањето на слободата, туку продолжува со обврската таа да се зачува.
„Мирот и слободата се неразделни, а праведното општество може да постои само таму каде што владее правото и секој ја презема својата одговорност кон државата и кон Уставот“, наведува претседателот на Уставниот суд, честитајќи им го на граѓаните Денот на Републиката.
