Напредокот на Македонија кон ЕУ зависи од уставните измени, порача еврокомесарката Марта Кос

Напредокот на Македонија во евроинтеграциите зависи од исполнувањето на условот за уставни измени, порача еврокомесарката за проширување Марта Кос, претставувајќи ги извештаите за земјите кандидати пред Европскиот парламент. Таа потврди дека Европската комисија е подготвена веднаш да го отвори првото преговарачко поглавје штом земјата го исполни условот утврден во 2022 година.

Кос оцени дека Македонија покажала посветеност во спроведувањето на реформите од Реформската агенда, но очекува истата решеност да ја покаже и во исполнувањето на условот за продолжување на европскиот пат.

— реклама —

Расправата во Комитетот за надворешни работи на Европскиот парламент беше одбележана и со отворање на билатералните спорови што ги имаат земјите кандидати со соседите членки на ЕУ. Хрватската европратеничка Жељана Зовко ги посочи нерешените прашања меѓу Загреб и Подгорица, додека претставници од Унгарија, Романија и Грција отворија прашања поврзани со малцинските права во Украина, односите меѓу Украина и Молдавија и дефинирањето на билатералните прашања во процесот на проширување.

— реклама —

Кос одговори дека билатералните прашања не се дел од преговорите за членство, но дека сепак треба да бидат решени. Во однос на Македонија, таа посочи дека од известувачот Томас Вајц слушнала оти се преземаат одредени чекори во односите со Бугарија и изрази надеж дека тие ќе продолжат во позитивна насока.

Вајц, пак, оцени дека примерот на Црна Гора покажува дека билатералните спорови можат да се решаваат преку дијалог. Тој порача дека македонската и бугарската влада треба да седнат и да разговараат, но забележа дека моментално недостига доволна политичка мотивација за таков пристап.

— реклама —

Кос ја посочи Црна Гора како земја која е најблиску до членство во Унијата, нагласувајќи дека напредокот е можен кога постои политичка волја. Таа најави и формален дијалог со земјите кандидати за постепена интеграција во ЕУ, која не го исклучува полноправното членство, како и нивно вклучување во европската безбедносна структура.

— реклама —

Во однос на другите кандидати, Кос соопшти дека Албанија има цел да ги затвори преговарачките поглавја до 2027 година, додека Молдавија планира тоа да го направи до 2028 година. За Украина рече дека, и покрај војната, покажува значителна посветеност на реформите. За Србија, пак, оцени дека сè уште има проблеми со антиевропскиот наратив во медиумите и меѓу политичарите, но порача дека Брисел е подготвен да ѝ помогне на новата влада во Белград да ги исполни условите за продолжување на преговорите.

Еврокомесарката ги подели земјите кандидати во три групи – оние што напредуваат кон членство, оние што се во застој и оние што назадуваат. Според неа, секоја земја може да премине во групата што напредува доколку ги спроведе потребните реформи и ги исполни условите за членство.