СДСМ побара одговорност од министерот за внатрешни работи Панче Тошковски, откако приведено лице осомничено за кривично дело поврзано со дрога избега од полициската станица во Кочани.
На прес-конференција, членката на Извршниот одбор на СДСМ, Рената Младеновска, оцени дека станува збор за сериозен безбедносен пропуст и побара темелна истрага за случајот.
„Нов скандал на Панче Тошковски – наркодилер му побегна од полициска станица во Кочани. Ако наркодилери можат слободно да бегаат од полициска станица, што значи тоа? Тотален распад. Швајцарско сирење. Тоа е сликата за денешната партизирана полиција“, рече Младеновска.
Таа постави повеќе прашања до Министерството за внатрешни работи, меѓу кои кој ќе понесе одговорност за бегството, зошто приведениот не бил сместен во просториите за задржување и дали некој му помогнал да избега.
СДСМ праша и за евентуална поврзаност на лицето со локални полициски функционери и со пратеник од ВМРО-ДПМНЕ, како и дали обвинителството веќе подготвувало предлог за определување мерка притвор.
Од партијата оценија дека, доколку овие информации се точни, случајот е уште посериозен и бара итна и темелна истрага.
„Во секоја нормална држава, ваков случај ќе значеше итна одговорност и оставки“, порача Младеновска.
СДСМ бара целосно расчистување на случајот, утврдување одговорност за сите инволвирани службени лица, вклучително и за раководството на ОВР Кочани, како и оставка од министерот Панче Тошковски.
