Насилно отворал прозорци и се обидувал да провали во џамии во Тетово, уапсен 35-годишен маж

Тетовската полиција расчистува случаи на кражби и обиди за тешки кражби во верски објекти во градот. По преземени оперативни мерки, уапсен е 35-годишен жител на селото Јеловјане, кој се сомничи за кривични дела поврзани со кражба и обид за кражба.

— реклама —

Според информациите од МВР, на 17 октомври во СВР Тетово биле пријавени три обиди за тешка кражба и една кражба во верски објекти, кои се случиле на 16 октомври.

Во верскиот објект „Фирдеус“ на улицата „Ван Вардарска“, во периодот меѓу 16 и 17 октомври, непознат сторител насилно го отворил прозорецот од подрумските простории и се обидел да ја отвори подрумската врата, по што го напуштил местото.

— реклама —

Во „Големата џамија“ на улицата „Горна Чаршија“, околу 5:30 часот, едно лице влегло во објектот и се обидело да го пронајде клучот. Потоа, со метален предмет се обидело да ја оштети и отвори вратата, по што се оддалечило.

— реклама —

Во „Ески“ џамијата на улицата „Пробиштипска“, одговорното лице А.Б. (38) од Тетово пријавило дека непознато лице се обидело да го отвори металниот сеф и го оштетило. Сефот бил пронајден поместен под столиците.

По преземените оперативни мерки, на 17 октомври во 12:30 часот на улицата „Борис Кидрич“ во Тетово, полицијата го лишила од слобода Д.С. (35) од селото Јеловјане, поради сомнение за сторени кривични дела „Тешка кражба“ и „Тешка кражба во обид“, казниви според член 235 од Кривичниот законик.

Од МВР информираат дека по целосното документирање на случајот против него ќе биде поднесена соодветна пријава.