Млекара Ѓоргиеви ДООЕЛ од Радовиш јавно ги демантираше, како што наведуваат, сите шпекулации и индиректни асоцијации кои во јавноста се појавиле во врска со скандалот за неправилно декларирање на млечни масти.
Од компанијата велат дека досега не добиле никакво решение, известување, казна или препорака од Агенцијата за храна и ветеринарство (АХВ) во однос на неправилности во декларирањето на нивните производи.
„До денес не сме добиле никакво решение, известување, казна или препорака од Агенцијата за храна и ветеринарство за неправилности во декларирањето на нашите производи“, соопштија од млекарницата.
Тие додаваат дека сите нивни производи биле тестирани и дека во целост ги исполнуваат законските стандарди за безбедност на храната.
„Сите наши производи се тестирани и во целост ги исполнуваат пропишаните стандарди за безбедност на храна — составот е идентичен со декларираниот“, наведуваат од компанијата.
Од Млекара Ѓоргиеви оценуваат дека шпекулациите засновани на непроверени информации можат да ја нарушат репутацијата на компанијата и да ги доведат потрошувачите во заблуда.
Во реакцијата се посочува дека АХВ досега јавно не ги објавила имињата на операторите кај кои биле констатирани неправилности, поради што, според нив, нема основ за поврзување на било кој производител со случајот без официјална потврда.
„Бараме од сите медиуми и профили да се придржуваат до факти и официјални соопштенија. АХВ јавно не ги објави имињата на казнетите оператори — затоа никаков медиум нема основа да асоцира кој и да е производител без официјална потврда“, стои во соопштението.
Од компанијата нагласуваат дека продолжуваат да работат според воспоставените стандарди и традиција.
„Нашите потрошувачи добиваат токму она што пишува на декларацијата. Најдобри кооперанти. Најдобри млечни производи. Традиција која трае“, наведуваат од Управата на Ѓоргиеви Млекарница ДООЕЛ Радовиш.
АХВ откри измами со млечни производи: Во сирење со декларација од 20% млечна маст имало само 1%
Вонредните контроли на Агенцијата за храна и ветеринарство (АХВ) открија сериозни отстапувања кај дел од млечните производи што се продаваат на домашниот пазар. Кај дел од анализираните примероци е утврдено дека реалниот процент на млечна маст е значително понизок од оној што бил наведен на декларацијата.Во рамки на контролите биле земени 91 мостра од млеко, млечни и сувомесни производи од домашно производство и од увоз. Досега се комплетирани резултатите за 45 мостри млеко и млечни производи, додека анализите за сувомесните производи сè уште траат.Според АХВ, кај 10 оператори биле утврдени неправилности во однос на квалитетот и означувањето на производите. Најдрастичен е случајот кај еден производител кај кој лабораториските анализи покажале дека ситно сирење, декларирано со 20 проценти млечна маст, всушност содржело само 1 процент. Поради измама на потрошувачите, на операторот му е изречена казна од 3.500 евра во денарска противвредност.Кај уште осум производители и увозници биле утврдени разлики меѓу декларираниот и реалниот процент на млечна маст, поради што им се изречени парични казни од по 1.050 евра.Дополнително, кај еден оператор било утврдено користење растителни, односно палмини масти во производ означен како млечен производ. За овој прекршок е изречена казна од 1.300 евра, а спорниот производ, во количина од 500 килограми, е повлечен од продажба и уништен.Од АХВ најавуваат дека засилените инспекциски контроли кај производителите и увозниците на млечни производи ќе продолжат и во наредниот период.
Македонија | пред 1 ден
